میری تنخواہ کہاں گئی؟


پاکستان میں ٹیکس دینا بھی ایک عجیب سا تجربہ ہے۔ آدمی صبح اٹھ کر کام پر جاتا ہے، مہینے بھر محنت کرتا ہے، تنخواہ آتی ہے تو اس میں سے پہلے ہی کچھ حصہ کہیں جا چکا ہوتا ہے۔ جو بچتا ہے اس سے گھر چلانے کی کوشش کرتا ہے اور پھر زندگی کی تقریباً ہر ضرورت پر اسے دوبارہ یاد دلایا جاتا ہے کہ آپ اس ملک کے شہری ہیں اور شہری ہونے کی کچھ قیمت ہوتی ہے۔


چائے پئیں تو ٹیکس، موبائل چلائیں تو ٹیکس، بجلی کا بل دیں تو ٹیکس، پیٹرول ڈلوائیں تو ٹیکس، بچوں کی چیزیں خریدیں تو ٹیکس، باہر کھانا کھائیں تو ٹیکس۔ کبھی کبھی دل کرتا ہے حکومت سے پوچھیں کہ سانس لینے پر ابھی تک کوئی ٹیکس نہیں لگا یا اس کا نوٹیفکیشن بھی راستے میں ہے۔


لیکن سچ یہ ہے کہ مسئلہ ٹیکس کا نہیں ہے۔ کسی بھی ملک کو چلانے کے لیے ٹیکس ضروری ہے۔ اسکول، اسپتال، سڑکیں، صفائی، پولیس، عدالتیں اور دوسری عوامی سہولتیں پیسے کے بغیر نہیں چل سکتیں۔ ایک ذمہ دار شہری کو اپنا حصہ دینا ہی چاہیے۔


مسئلہ وہاں شروع ہوتا ہے جہاں شہری اپنا حصہ دے کر یہ سوچنے لگتا ہے کہ میرا حصہ جا کہاں رہا ہے۔


ایک تنخواہ دار آدمی کو دیکھیں۔ اس کی آمدن چھپانا شاید سب سے مشکل کام ہے۔ تنخواہ آنے سے پہلے حساب ہو جاتا ہے۔ پھر اسی تنخواہ سے بجلی کا بل جاتا ہے، گیس کا بل جاتا ہے، بچوں کی فیس جاتی ہے، گھر کا راشن آتا ہے، گاڑی میں پیٹرول ڈلتا ہے اور ان سب کے درمیان کہیں نہ کہیں ٹیکس بھی موجود ہوتا ہے۔


مہینے کے آخر میں وہ اپنی جیب دیکھتا ہے تو اسے سمجھ نہیں آتی کہ اتنے پیسے آئے تھے تو گئے کہاں۔


شاید پیسے بھی یہی سوچ رہے ہوتے ہیں۔


پھر یہی آدمی بازار جاتا ہے۔ دکاندار سے کہتا ہے رسید دے دیں۔


دکاندار مسکرا کر کہتا ہے باجی رسید کے بغیر سستا پڑے گا۔


اب عام آدمی کے سامنے بھی ایک عجیب سی صورتحال ہوتی ہے۔ ایک طرف وہ حکومت سے شکایت کر رہا ہے کہ سب کو ٹیکس دینا چاہیے اور دوسری طرف جب اپنی جیب سے کچھ بچانے کا موقع ملتا ہے تو وہ رسید چھوڑ دیتا ہے۔


پھر حکومت کہتی ہے عوام ٹیکس نہیں دیتے۔


عوام کہتے ہیں حکومت ٹیکس لے کر کرتی کیا ہے۔


اور یوں دونوں ایک دوسرے سے ناراض بھی رہتے ہیں اور ایک دوسرے کی دلیل بھی سمجھتے ہیں۔


یہ ہمارے نظام کی شاید سب سے بڑی بدقسمتی ہے کہ ٹیکس شہری ذمہ داری کے بجائے شہری سزا محسوس ہونے لگا ہے۔ جس کی آمدن باقاعدہ ہے اس سے حساب لینا آسان ہے، جس کا کاروبار دستاویزی ہے اسے پکڑنا آسان ہے اور جو نظام سے باہر ہے اسے نظام میں لانا ہمیشہ مشکل رہتا ہے۔


اور پھر سب سے زیادہ تکلیف اس وقت ہوتی ہے جب عام آدمی کو یہ احساس ہو کہ قانون سب کے لیے ایک جیسا نہیں ہے۔


ایک ملازم کی چند ہزار روپے کی آمدن بھی حساب میں آ جاتی ہے لیکن بڑے پیمانے پر آمدن چھپانے والے کے لیے کبھی قانون کمزور پڑ جاتا ہے، کبھی راستہ نکل آتا ہے اور کبھی اتنے دروازے کھل جاتے ہیں کہ عام آدمی حیران رہ جاتا ہے کہ یہ دروازے اس کے لیے کیوں نہیں تھے۔


ہم پھر بھی کہتے ہیں کہ سب برابر ہیں۔


شاید کاغذ پر ہیں۔


ہم عوام بھی مکمل طور پر بے قصور نہیں۔ ہم سستی چیز کے لیے رسید چھوڑ دیتے ہیں۔ ٹیکس سے بچنے کا راستہ ملے تو اسے ذہانت سمجھتے ہیں۔ قانون کی خلاف ورزی اگر اپنے فائدے میں ہو تو اسے مجبوری کا نام دے دیتے ہیں اور جب یہی قانون کسی طاقتور کے حق میں استعمال ہو تو ہم غصے سے کہتے ہیں کہ ملک میں قانون نام کی کوئی چیز نہیں۔


ہم بھی اسی نظام کا حصہ ہیں جس کی شکایت کرتے ہیں۔


لیکن ریاست کی ذمہ داری اس سے کم نہیں ہو جاتی۔


اگر آپ چاہتے ہیں کہ ایک عام آدمی ایمانداری سے ٹیکس دے تو اسے صرف یہ نہ بتائیں کہ ٹیکس دینا اس کا فرض ہے۔ اسے یہ بھی دکھائیں کہ اس کے فرض کا نتیجہ کیا نکلا۔


اسے یہ یقین دیں کہ اس کے بچے کے اسکول میں استاد موجود ہوگا۔ بیمار ہونے پر اسپتال میں عزت کے ساتھ علاج ملے گا۔ سڑک بنے گی تو پہلی بارش میں بہہ نہیں جائے گی۔ بجلی کا بل آئے گا تو بجلی بھی ملے گی۔ اور قانون صرف اس شخص کے لیے سخت نہیں ہوگا جس کے پاس اس سے بچنے کی طاقت نہیں ہے۔


شاید پاکستانی ٹیکس نہیں دینا چاہتے والی بات پوری حقیقت نہیں ہے۔


شاید ہم صرف یہ چاہتے ہیں کہ جو پیسہ ہم سے لیا جا رہا ہے اس کے ساتھ ہمیں عزت اور یقین بھی ملے۔


کیونکہ ایک عام آدمی اپنی جیب سے پیسے نکالتے وقت یہ نہیں سوچتا کہ وہ ریاست کو چند ہزار روپے دے رہا ہے۔ وہ سوچتا ہے کہ یہ وہ پیسے ہیں جن سے اس کے بچے کی فیس جانی تھی، گھر کا راشن آنا تھا، ماں کی دوا لینی تھی یا مہینے کے آخری دن گزارنے تھے۔


اس لیے جب وہ ٹیکس دیتا ہے تو اسے صرف رقم نہیں دینی ہوتی۔ اسے اعتماد بھی کرنا پڑتا ہے۔


ریاست اور شہری کے درمیان اصل معاہدہ شاید یہی ہے۔


شہری کہتا ہے میں اپنا حصہ دوں گا۔


ریاست کو جواب دینا چاہیے کہ ہم بھی تمہارا حصہ ایمانداری سے واپس اس معاشرے پر خرچ کریں گے۔


کیونکہ ٹیکس صرف پیسہ نہیں ہوتا۔ یہ ریاست اور شہری کے درمیان اعتماد کا رشتہ بھی ہوتا ہے۔


اور شاید پاکستان میں سب سے بڑا ٹیکس ہماری جیبوں سے نہیں بلکہ ہمارے اعتماد سے وصول ہو چکا ہے۔


اب وقت ہے کہ ریاست صرف ٹیکس نہ مانگے۔


اعتماد بھی واپس کمائے۔


کیونکہ خالی جیب والا آدمی کچھ عرصہ مشکل سے گزارا کر لیتا ہے لیکن جب کسی معاشرے کا اعتماد خالی ہو جائے تو پھر پورا معاشرہ آہستہ آہستہ اندر سے خالی ہونے لگتا ہے۔

Comments

  1. بہت عمدہ اور حقیقت پسندانہ تحریر۔ مسئلہ ٹیکس دینے کا نہیں، بلکہ ٹیکس کے منصفانہ نفاذ، شفاف استعمال اور ریاستی جواب دہی کا ہے۔ شہری اپنی محنت کی کمائی سے حصہ دے تو اسے بدلے میں بنیادی سہولتیں، قانون کی برابری اور عزت ضرور ملنی چاہیے۔ ریاست صرف ٹیکس وصول کرکے نہیں، اس کے درست استعمال کا ثبوت دے کر اعتماد حاصل کرتی ہے۔ حقیقت یہی ہے کہ پاکستان میں سب سے بھاری ٹیکس عوام کی جیب سے نہیں، ان کے اعتماد سے وصول کیا گیا ہے۔

    ReplyDelete
  2. Reailty base zabardast.

    ReplyDelete

Post a Comment

Popular posts from this blog

The Role of Zulfiqar Ali Bhutto in the Secession of East Pakistan: A Comprehensive Analysis

جنابِ عمران خان کو ایک خط